Azərbaycan Respublikasının Prezidenti Aşqabadda “Xalq xatirəsi” memorial kompleksini ziyarət etmişdir
Azərbaycan Respublikasının Prezidenti İlham Əliyev noyabrın 21-də Aşqabadda “Xalq xatirəsi” memorial kompleksini ziyarət edib.
Kompleksdə 1881-ci ildə Göytəpə döyüşlərində şəhid olmuş, 1948-ci ildə Aşqabadda baş vermiş zəlzələ zamanı həyatlarını itirmiş və Böyük Vətən müharibəsində həlak olmuş insanların xatirəsinə abidələr ucaldılıb.
Prezident İlham Əliyev “Əbədi şöhrət” abidəsinin önünə əklil qoydu.
Sonra dövlətimizin başçısı “Vətən müqəddəsliyi” muzeyi ilə tanış olub.
Muzeydə Göytəpə döyüşlərinin maketi quraşdırılıb, eyni zamanda, Göytəpə qalası, həmin döyüşlərin qəhrəmanları, döyüşlər zamanı istifadə olunan silah və libaslar, həmçinin digər eksponatlar nümayiş olunur.
Dövlətimizin başçısı 1881-ci ildə baş vermiş Göytəpə döyüşlərinin instalyasiyasına baxdı. Muzeydə, eyni zamanda, Böyük Vətən müharibəsi, onun qəhrəmanları, həmçinin həmin müharibə zamanı hərbçilərin istifadə etdikləri geyimlər, silah-sursat və digər eksponatlar sərgilənir.
Muzeyin növbəti bölməsi 1948-ci ildə Aşqabadda baş verən zəlzələyə həsr olunub. Burada həmin zəlzələ zamanı dağılan binaların qalıqlarının maketləri təqdim edilir.
Türkmənistanın inkişafına həsr olunan bölmədə müasir Aşqabadın görkəmini əks etdirən fotolar nümayiş etdirilir.
Prezident İlham Əliyev muzeyin xatirə kitabına ürək sözlərini yazdı.
