Prezidentler Ylham Aliýew hem-de Serdar Berdimuhamedow Şuşada Azerbaýjanyň meşhur şahsyýetleriniň basyp alyşlyk döwründe oklanan büstlerini synladylar
23-nji iýunda Azerbaýjan Respublikasynyň Prezidenti Ylham Aliýew hem-de Türkmenistanyň Prezidenti Serdar Berdimuhamedow Azerbaýjanyň görnükli şahsyýetleri Natawan, Bülbül we Üzeýir Hajybeýliniň basyp alyşlyk döwründe oklanan büstlerini synladylar.
Türkmenistanyň Prezidentine basyp alyşlyk döwründe ermeni wandalizmine sezewar edilen bu büstleriň talanyp, Ermenistana äkidilendigi hem-de metal galyndysy hökmünde eredilmäge synanyşylandygy barada maglumat berildi.
Hut Beýik Ýolbaşçy Geýdar Aliýewiň gatyşmagy netijesinde bu ýadygärlikler halas edilip, Azerbaýjana gaýtarylyp getirildi.
Birnäçe wagtlap Baku şäherindäki Azerbaýjanyň Milli sungat muzeýiniň howlusynda saklanylan bu büstler Şuşa basyp alyşlykdan azat edilenden soň, öňki ýerleşýän ýerlerine gaýtaryldy.
