Bakuda Türkmenistanyň Prezidenti Serdar Berdimuhamedowy resmi garşylamak dabarasy geçirildi
Iýun aýynyň 22-ne Azerbaýjan Respublikasyna döwlet sapary bilen gelen Türkmenistanyň Prezidenti Serdar Berdimuhamedowy resmi garşylamak dabarasy geçirildi.
Iki ýurduň Döwlet baýdaklarynyň pasyrdap duran meýdançasynda Türkmenistanyň Prezidentiniň hormatyna Hormat garawulynyň hatary düzüldi.
Azerbaýjan Respublikasynyň Prezidenti Ylham Aliýew Türkmenistanyň Prezidenti Serdar Berdimuhamedowy garşylady.
Hormat garawulynyň serkerdesi Türkmenistanyň Prezidentine raport berdi.
Türkmenistanyň we Azerbaýjan Respublikasynyň Döwlet senalary ýaňlandyryldy.
Soňra Hormat garawulynyň hatary harby marşyň sazynyň astynda Azerbaýjan Respublikasynyň Prezidenti Ylham Aliýewiň hem-de Türkmenistanyň Prezidenti Serdar Berdimuhamedowyň öňünden dabaraly ýöriş bilen geçdi.
Azerbaýjan wekiliýetiniň agzalary Türkmenistanyň Prezidenti Serdar Berdimuhamedowa, Türkmenistanyň wekiliýetiniň agzalary bolsa Azerbaýjan Respublikasynyň Prezidenti Ylham Aliýewe tanyşdyryldy.
Döwlet Baştutanlary resmi ýadygärlik surata düşdüler.
