Azerbaýjan bilen Türkmenistanyň Prezidentleri Füzuli şäheriniň haraba bolan ýerlerini synladylar
23-nji iýunda Azerbaýjan Respublikasynyň Prezidenti Ylham Aliýew hem-de Türkmenistanyň Prezidenti Serdar Berdimuhamedow Fizuli şäheriniň haraba bolan ýerlerini synladylar.
Agdam, Füzuli we Hojawend etraplarynda Prezidentiň ýörite wekili Emin Hüseýnow 30 ýyllyk basyp alyş döwründe Füzuli etrabynda Ermenistan ýaragly güýçleri tarapyndan ýetirilen weýrançylyklar, vandalçylyk hereketleri hem-de şäheriň Baş meýilnamasyna laýyklykda amala aşyrylýan we geljekde ýerine ýetiriljek işler barada Türkmenistanyň Prezidentine maglumat berdi.
Bellenilişi ýaly, ozal dykyz ilatly hem-de ösüş ýolunda bolan Füzuli şäheri ermeni basyp alyşlygy döwründe doly talaň edilip, haraba öwrülipdir. Basyp alyşlykdan azat edilenden soň gysga wagtda şäheriň Baş meýilnamasy taýýarlanyldy we döwlet Baştutany tarapyndan tassyklanyldy.
Füzuli uly ulag-logistika mümkinçiliklerine eýe bolup, Garabag we Gündogar Zengezur ykdysady sebitleriniň esasy ulag geçelgeleriniň çatrygynda ýerleşýär. Umumy meýdany 2 müň gektara golaý bolan Füzuli şäheriniň Baş meýilnamasyna laýyklykda, 2040-njy ýyla çenli bu ýerde 50 müň adamyň ýaşamagy göz öňünde tutulýar. Häzirki zaman şäher gurluşyk ülňülerine laýyklykda gaýtadan gurulýan Füzulide “akylly şäher” konsepsiýasy ornaşdyrylar.
Ýokary derejeli myhmana Türkmenistanyň tarapyndan Füzulide gurulýan metjit barada hem maglumat berildi.
Bellenilişi ýaly, bu metjidiň düýbi Prezident Ylham Aliýew, Türkmenistanyň Halk Maslahatynyň Başlygy Gurbanguly Berdimuhamedow hem-de Türki Döwletler Guramasynyň Döwlet Baştutanlarynyň Geňeşiniň geçen ýylyň oktýabr aýynda Gabalada geçirilen 12-nji sammitine gatnaşan beýleki döwlet we hökümet ýolbaşçylary tarapyndan onlaýn görnüşde goýuldy.
Metjit toplumynyň umumy meýdany 1 gektardan gowrakdyr. Metjidiň hersi 40 metr belentlikdäki iki minarasy bolar. Esasy gümmeziň beýikligi 30 metr bolar. Metjitde bir wagtda 500 adama çenli ybadat etmäge mümkinçilik dörediler.
